राजु काश्यप को एक कविता

'एक व्यथा ! यो मुटुको'
हिजोसम्म तिमी मेरो सामु हुन्थ्यौ,
मेरा हरेक कुरा र कविताहरु सुन्थ्यौ,
मेरो हरेक पाइलामा छायाँ झैँ
साथ तिमी दिन्थ्यौ।
तर !!!
आज तिमी अर्कैको अँगालोमा,
उसैका कुरा सुन्दै हौली?
र म तड्पीँदै भौतारिन्छु यता-उता
हर कदममा तिम्रो कमीको आभास पाउँछु।
यो बिछोडिएको हृदय हर पल, हर क्षण
तिम्रै याद र सम्झनामा रोइरहन्छ,
र मेरा हर गीत, कवितामा हर दिन
तिम्रै सम्झना र बिछोडको तस्बिर झल्किन्छ।
थाहा छ मलाई-
अब तिमी कदापि मेरी हुने छैनौ
तर पनि यी दुई नयनले हर घडी
तिमीसंग मिलनको मधुर सपना देख्छन्॥
-राजु काश्यप
(भारतको उत्तर-पुर्वाञ्चलीय नवीन कविहरुको कविता संकलन 'अनुभवको साइनो'-मा प्रकाशित)